სსიპ - მიხეილ ჯავახიშვილის სახელობის ქალაქ თბილისის №124 საჯარო სკოლა

ჩვენი მისიაა: ჯანსაღ, უსაფრთხო და პოზიტიურ სასკოლო გარემოში ხარისხიანი განათლებითა და უცხოური ენების გაძლიერებული სწავლების მხარდაჭერით აღვზარდოთ 21-ე საუკუნის ღირსეული მოქალაქეები. ჩვენი ხედვით: სსიპ - მიხეილ ჯავახიშვილის სახელობის ქალაქ თბილისის N124 საჯარო სკოლა შეძლებს მოსწავლეთა აღჭურვას ენობრივი კომპეტენციებით, რასაც მივაღწევთ ევროპულ საგანმანათლებლო სივრცესთან სასკოლო საზოგადოების მჭიდრო თანამშროომლობა/კოლაბორაციით. კურსდამთავრებულები შეძლებენ სკოლის ფარგლებში შეძენილი ცოდნით, უნარებითა და ღირებულებებით თავი დაიმკვიდრონ თანამედროვე ციფრული ტექნოლოგიებით აღჭურვილ სამყაროში არა მხოლოდ საგანმანათლებლო სივრცეში აკადემიური მიმართულებით, არამედ შრომის ბაზარზეც, როგორც საქართველოში, ასევე მსოფლიო მასშტაბით. ორგანიზაციის ღირებულებები: 1. თანამშრომლობა: ჩვენ ღია ვართ დაინტერესებულ მხარეებთან თანამშრომლობისათვის. კონსტრუქციულად განვიხილავთ სიახლეებს, წინადადებებს, განსხვავებულ პოზიციებსა და ორიენტირებულნი ვართ პრობლემების გადაჭრაზე. 2. გუნდურობა: ეფექტურად მუშაობისთვის მნიშვნელოვანია როლების შესაბამისი გადანაწილება.  ორგანიზაციის თითოეულ წევრს გაცნობიერებული გვაქვს საკუთარი უფლება-მოვალეობები და პასუხისმგებლობა, რომელიც კონკრეტული როლიდან გამომდინარეობს. 3. გამჭირვალობა: სასკოლო საქმიანობაში მოქმედი პროცედურები, ჩვენი ხედვები და ღირებულებები საჯაროა, წინასწარ ცნობილია და ხელმისაწვდომი. 4. დემოკრატიული მართვა: ჩვენ ვუზრუნველვყოფთ, რომ მიღებული გადაწყვეტილებები შეესაბამებოდეს მოქმედ კანონმდებლობას და ითვალისწინებდეს მონაწილეთა საუკეთესო ინტერესებს. 5. ობიექტურობა: ჩვენ მიერ განხორციელებული შეფასებები, ასევე თვითშეფასება ეფუძნება კანონმდებლობით დადგენილ სტანდარტებსა და ფაქტობრივ გარემოებებს. ყველა პროცედურები მაქსიმალურად გამორიცხავს შეფასებაში მონაწილე პირების სუბიექტივიზმს. 6. განვითარება და ინოვაციურობა: სისტემატურად ვაფასებთ ჩვენს საქმიანობას და შეფასების შედეგებზე დაყრდნობით, ვგეგმავთ განვითარების ინოვაციურ გზებს.

სტრუქტურა

სსიპ - მიხეილ ჯავახიშვილის სახელობის ქალაქ თბილისის N124 საჯარო სკოლა დაფუძნებულია განათლებისა და მეცნიერების მინისტრის 15 სექტემბრის N448 ბრძანების საფუძველზე საჯარო სამართლის იურიდიულ პირად. 2023-2024 სასწავლო წლის სკოლის სასწავლო გეგმა შედგენილია საქართველოს განათლებისა და მეცნიერების მინისტრის 2016 წლის 18 მაისის N40/ნ ბრძანებით და 2011 წლის 11 მარტის N36/ნ ბრძანებით დამტკიცებული ეროვნული სასწავლო გეგმების საფუძველზე. სკოლაში სწავლება მიმდინარეობს ქართულ ენაზე - დაწყებით, საბაზო და საშუალო საფეხურზე. დაწყებითი საფეხური მოიცავს I-VI კლასებს, საბაზო საფეხური - VII-IX კლასებს, ხოლო საშუალო საფეხური- X-XII კლასებს. სსიპ მიხეილ ჯავახიშვილის სახელობის ქალაქ თბილისის N124 საჯარო სკოლის სასკოლო-სასწავლო გეგმა, ეფუძნება ეროვნულ სასწავლო გეგმას. უფრო კონკრეტულად კი კონსტრუქტივისტულ საგანმანათლებლო კონცეფციას, რომელიც განსაზღვრავს ხუთ ძირითად საგანმანათლებლო პრინციპს. სწორედ ამ პრინციპებს უნდა დაეყრდნოს სწავლა-სწავლების პროცესი. ეს პრინციპებია: ა) სწავლა-სწავლება ხელს უნდა უწყობდეს მოსწავლეთა შინაგანი ძალების გააქტიურებას. მიღებული ინფორმაცია ცოდნად გარდაიქმნება მოსწავლის მიერ მისი აქტიური დამუშავების შედეგად. მოსწავლე მიწოდებული ინფორმაციიდან გამოარჩევს ცოდნის შენებისთვის (კონსტრუირებისთვის) მნიშვნელოვან ელემენტებს და ცოდნად გარდაქმნის შერჩეულ ინფორმაციას სხვადასხვა სააზროვნო ოპერაციის განხორციელების საფუძველზე. ბ) სწავლა-სწავლება ხელს უნდა უწყობდეს ცოდნის ეტაპობრივად კონსტრუირებას წინარე ცოდნაზე დაფუძნებით. ინფორმაციის დამუშავება და ცოდნად გარდაქმნა წინარე ცოდნის საშუალებით ხორციელდება. წინარე ცოდნა განაპირობებს იმას, თუ მიწოდებული ინფორმაციიდან რა კომპონენტებს მიაქცევს ყურადღებას მოსწავლე და რის სწავლას შეძლებს იგი. გ) სწავლა-სწავლება ხელს უნდა უწყობდეს ცოდნათა ურთიერთდაკავშირებას და ორგანიზებას. მეხსიერებაში ცოდნათა ურთიერთდაკავშირება და ორგანიზება ზრდის გააზრების, დამახსოვრებისა და ცოდნის ფუნქციური გამოყენების შესაძლებლობებს. დ) სწავლა-სწავლება უნდა უზრუნველყოფდეს სწავლის სტრატეგიების დაუფლებას (სწავლის სწავლა). სწავლის პროცესში მართებული ხერხებისა და მიდგომების გამოყენება წარმატებული სწავლის განმსაზღვრელ ფაქტორს წარმოადგენს. კონკრეტული მიზნის მისაღწევად განსახორციელებელ ქმედებათა გააზრებულად, გაცნობიერებულად დაგეგმვა და კოორდინირება ზრდის მოსწავლის ქმედობაუნარიანობას, ეხმარება მას მიზნის ეფექტიანად მიღწევასა და სიძნელეთა გადალახვაში. აქედან გამომდინარე, მასწავლებელი ვალდებულია დააფიქროს მოსწავლე იმ ხერხებსა თუ მიდგომებზე, რომლებსაც იგი გამოიყენებს მიზნის მისაღწევად და დაეხმაროს მათ შორის, საუკეთესოს აღმოჩენაში. ე) სწავლა-სწავლება უნდა მოიცავდეს ცოდნის სამივე კატეგორიას: დეკლარატიულს, პროცედურულსა და პირობისეულს. ე.ა) დეკლარატიული ცოდნა სტატიკური ხასიათისაა. იგი გულისხმობს თეორიების, ფაქტების, წესების ცოდნას და პასუხობს კითხვას: რა ვიცი? ე.ბ) პროცედურული ცოდნა დინამიკურია და იძლევა ცოდნის რეალიზების საშუალებას. პროცედურული ცოდნა პასუხობს კითხვას: როგორ გავაკეთო/როგორ შევასრულო? ე.გ) პირობისეული ცოდნა დინამიკურია და გულისხმობს პირობების, ანუ არსებითი ნიშან-თვისებების ამოცნობას. იგი უზრუნველყოფს სხვადასხვა კონტექსტში ცოდნის ადეკვატურად გამოყენებას და პასუხობს კითხვას: როდის და/ან რატომ გამოვიყენო ეს ცოდნა? უფრო მეტი იხ. მიბმული ფაილი

სსიპ - მიხეილ ჯავახიშვილის სახელობის ქალაქ თბილისის N124 საჯარო სკოლის შინაგანაწესი

ფოტოსურათები