სსიპ - ქალაქ თბილისის №45 საჯარო სკოლა

სკოლის მისია ურთიერთზრუნვითა და თანამშრომლობით ვქმნით უსაფრთხო, ინოვაციურ და ინკლუზიურ სასწავლო გარემოს, თითოული მოსწავლის წარმატებული და ბედნიერი მომავლისათვის. ხედვა ჩვენ ვიქნებით ყველაზე ინოვაციური და მოთხოვნადი სკოლა საქართველოში. ღირებულებები სკოლა უპირველეს ყოვლისა, ხელმძღვანელობს სასწავლო პროცესში ჩართული პირების საუკეთესო ინტერესებით და საქმიანობას წარმართავს შემდეგ ღირებულებებზე დაყრდნობით: • გამჭირვალობა: ჩვენი საქმიანობა, ხედვები და ღირებულებები საჯაროდაა ხელმისაწვდომი და წინასწარ ცნობილია ყველა დაინტერესებული პირისათვის, უზრუნველყოფილია სკოლის საქმიანობის შესახებ ინფორმაციის საჯაროობა. • მიუკერძოებლობა: ჩვენ უზრუნველვყოფთ, რომ სკოლის მიერ მიღებული გადაწყვეტილებები შეესაბამება მოქმედ კანონმდებლობასა და ითვალისწინებს დაინტერესებულ მხარეთა საუკეთესო ინტერესებს. • თანამშრომლობა: ჩვენ ღია ვართ დაინტერესებულ მხარეებთან თანამშრომლობისათვის. კონსტრუქციულად განვიხილავთ სიახლეებს, წინადადებებს, განსხვავებულ პოზიციებსა და ორიენტირებულნი ვართ პრობლემების გადაჭრაზე. • ობიექტურობა: ჩვენ მიერ განხორციელებული შეფასებები, ეფუძნება ეროვნულ სასწავლო გეგმას და ფაქტობრივ გარემოებებს. დადგენილი პროცედურები მაქსიმალურად გამორიცხავს შეფასებაში მონაწილე პირების სუბიექტივიზმს. • განვითარება და ინოვაციურობა: სისტემატურად ვაფასებთ ჩვენს საქმიანობას და შეფასების შედეგებზე დაყრდნობით, ვგეგმავთ განვითარების ინოვაციურ გზებს. არ ვერიდებით სიახლეების დანერგვას.

პროგრამები ,მხარდაჭერის სერვისები სკოლის პოლიტიკიდან გამომდინარე, ძირითადი საგნების შესწავლასთან ერთად, მნიშვნელოვანია არაფორმალური განათლების მიღება, მოსწავლეების განვითარება კულტურილი, სპორტული და სხვა მიმართულებით. სკოლის სურვილია მოსწავლეებს შეეძლოთ მათთვის საინტერესო მომსახურება მიიღონ ადგილზე. არაფორმალური განათლება წარმოადგენს განათლების ახალი როლის - ,, განათლება-მდგრადი განვითარებისთვის’’ მნიშვნელოვან შემადგენელ ნაწილს და გარკვეულწილად პასუხობს განათლების ახალ გამოწვევას. სკოლაში არაფორმალური განათლება ორიენტირებულია მოსწავლეთა საჭიროებებისა და ინტერესების დაკმაყოფილებაზე. არაფორმალური განათლება სკოლაში იქნება უფრო მიმზიდველი, რადგან ფორმალურ განათლებასთან მიმართებაში მისი ძირითადი მახასიათებელია:  მოსწავლეთა საჭიროებებზე მორგებული სწავლება ;  მყარი კავშირი პრაქტიკასთან (ფორმალური და არაფორმალური განათლების ინტეგრაცია - ,,გამაკეთებინე და ვისწავლი’’);  პროფესიული/სახელოვნებო განათლების მხარდაჭერა;  სწავლებისთვის ინკლუზიური გარემოს უზრუნველყოფა. არაფორმალური განათლების ხელშეწყობის მიზნით სკოლა უზრუნველყოფს :  არაფორმალური სივრცეების მოწყობას;  წრეებისა და კლუბების შექმნას მოსწავლეთა ინტერესების მიხედვით;  ერთობლივი პროექტების განხორციელება პროფესიულ ორგანიზაციებთან თანამშრომლობით;  საზაფხულო ბანაკების მოწყობა;  პროექტებით სწავლება;  რემედიაცია. მოსწავლეთა ინტერესების გათვალისწინებით, სკოლაში ფუნქციონირებს შემდეგი კლუბები :  ,,მწვანე სიცოცხლე“;  ,,ჩხირკედელა 2’’;  სახალისო ფრენბურთი;  ,,წიგნის ქურდი ქურდი არ არის“;  ,,სამოქალაქო კლუბი სმარტი“;  ლიტერატურის კლუბი “პლატფორმა 9 3/4“;  ,,წაიღე-წიგნები-საგზლად'.' ისტორიის კლუბი ,,ნიკე"; სკოლაში ფუნქციონირებს დამატებით საგანმანათლებლო და სააღმზრდელო მომსახურება ფასიანი წრის სახით: ,,გახანგრძლივებულის წრე“

მოსწავლეთა უფლებების დაცვა სასწავლო პროცესში სკოლა იცავს ,,ზოგადი განათლების შესახებ’’ საქართველოს კანონით აღიარებულ მოსწავლის უფლებებსა და თავისუფლებას. მათ შორის: 1. სკოლა უზრუნველყოფს ზოგადი განათლების მიღების თანაბარ ხელმისაწვდომობას ყველა მოსწავლისათვის. 2. სკოლაში უზრუნველყოფილია სპეციალური საგანმანათლებლო საჭიროების მქონე მოსწავლისათვის განათლების მიწოდება შესაბამისი ადამიანური რესურსითა და პროგრამებით/სერვისებით. 3. სკოლა იღებს ყველა გონივრული ზომას მოსწავლის ცოდნის სამართლიანი შეფასების უზრუნველსაყოფად. დაუშვებელია, მოსწავლის აკადემიური შეფასება განპირობებული იყოს მისი დისციპლინით. 4. სკოლაში ჩარიცხული ყველა მოსწავლე დაცულია არასათანადო მოპყრობის, უყურადღებობისა და შეურაცხყოფისაგან. 5. სკოლის ტერიტორიაზე და სასკოლო დროს უზრუნველყოფილია ჯანმრთელობისათვის, სიცოცხლისა და საკუთრებისათვის უსაფრთხო გარემო და ზოგადსაგანმანათლებლო დაწესებულებაში უსაფრთხოებისა და საზოგადოებრივი წესრიგის დაცვის წესი და პირობები. 6. სკოლა იღებს ყველა გონივრულ ზომას სასკოლო დროს, აგრეთვე სკოლის ან მის მიმდებარე ტერიტორიაზე მოსწავლის, მშობლის და მასწავლებლის უფლებებისა და თავისუფლებების ჯეროვანი დაცვის, დარღვევის თავიდან აცილების ან აღკვეთის მიზნით. 7. სკოლაში სასკოლო დისციპლინა დაცულია სკოლის შინაგანაწესით. 8. სკოლის მოსწავლე სარგებლობის მობილობის უფლებით, რის შესახებაც ინფორმირებულია მოსწავლის მშობელი. 9. სკოლის ყველა მოსწავლე და მშობელი ფლობს ინფორმაციას საკუთარი და სხვა მოსწავლეების უფლებებისა და თავისუფლებების, აგრეთვე მათი შეზღუდვის საფუძვლების შესახებ, რის გაცნობასაც უზრუნველყოფს სკოლა დამრიგებლების მეშვეობით. 10. სკოლა უზრუნველყოფს მოსწავლეთა ჩართულობას სკოლის მართვაში (მოსწავლეთა თვითმმართველობა, დისციპლინური კომიტეტი, სამეურვეო საბჭო). 11. სკოლა მოსწავლის მიმართ ქმედების განხორციელებისას გადაწყვეტილებას იღებს მოსწავლის ჭეშმარიტი ინტერესის გათვალისწინებით. 12. მოსწავლეს და მის მშობელს/კანონიერ წარმომადგენელს უფლება აქვს, უფლებებისა და თავისუფლებების დასაცავად გაასაჩივრონ მის მიმართ მიღებული უკანონო და სხვა არამართლზომიერი ქმედებები.

ზოგადი განათლების შესახებ’’ საქართველოს კანონის 43-ე მუხლის პირველი პუნქტის ,,თ’’ ქვეპუნქტისა და ,,ზოგადსაგანმანათლებლო დაწესებულებების საჯარო სამართლის იურიდიულ პირებად დაფუძნებისა და საჯარო სკოლის წესდების დამტკიცების შესახებ’’ საქართველოს განათლებისა და მეცნიერების მინისტრის 2005 წლის 15 სექტემბრის N448 ბრძანების დანართი N1-ით დამტკიცებული ,,საჯარო სკოლის წესდების“ მე-7 მუხლის პირველი პუნქტის ,,კ’’ ქვეპუნქტის თანახმად, სკოლის დირექტორს ეკისრება ვალდებულება ყოველი წლის 10 დეკემბრამდე სამეურვეო საბჭოს წინაშე წარსდგეს და გააცნოს ანგარიში ფინანსური საქმიანობისა და სასწავლო პროცესის მიმდინარეობის შესახებ.