სსიპ - ქალაქ თბილისის №65 საჯარო სკოლა

სკოლის მისია სსიპ ქალაქ თბილისის N65 საჯარო სკოლის მისიაა ღირსეული, ინტელექტუალური, ტოლერანტი და ეროვნული ღირებულებებით გამსჭვალული წიგნიერი თაობის აღზრდა; მოზარდებში პირადი და სოციალური პასუხისმგებლობის განცდის, განსხვავებული აზრის მოსმენის, პატივისცემისა და შემწყნარებლობის გრძნობის ჩამოყალიბება. ჩვენი მიზანია უსაფრთხო გარემოში წავახალისოთ მოსწავლეთა კრიტიკული აზროვნება, გავამრავალფეროვნოთ მათი უნარები და ცოდნა, რათა სწავლა არ უკავშირდებოდეს შიშსა და მძიმე შრომას; თითოეულმა მოსწავლემ იპოვოს საკუთარი რიტმი და არასდროს იქცეს მორჩილ, პასიურ ,,მოაზროვნედ“; იყოს კონკურენტუნარიანი; სწორად შეაფასოს და განსაზღვროს პროფესიული არჩევანი; შეძლოს ცოდნისა და გამოცდილების ტრანსფერი განსხვავებულ შინაარსობრივ კონტექსტში; სკოლის დასრულების შემდეგ გაუმკლავდეს ცხოვრებისეულ სირთულეებს და წარმატებით გაართვას თავი საკუთარი შესაძლებლობების, ნიჭისა და უნარების წარმატებით რეალიზებას.

სსიპ ქალაქ თბილისის N65 საჯარო სკოლის სასკოლო საზოგადოება მოიცავს: სამეურვეო საბჭო, მრჩეველთა საბჭო, მოსწავლეთა თვითმმართველობა, დისციპლინური კომიტეტი, პედაგოგიური საბჭო, დირექტორ, ბუღალტერი, დირექტორის მოადგილე, ადმინისტრაცია, საგნობრივი კათედრა; ტექნიკური პერსონალი, დირექციის დამხმარე პერსონალი.

საჯარო სკოლების ძირითადი დანიშნულება მოსწავლეებისათვის მაღალი ხარისხის საგანმანათლებლო მომსახურების უზრუნველყოფაა. საჯარო სკოლა ვალდებულია, ხელი შეუწყოს ისეთი სამუშაო და სასწავლო გარემოს ფორმირებას, რომელიც შესაბამისობაში იქნება მის საგანმანათლებლო მისიასთან. საჩივრების ეფექტური სისტემის არსებობა საჯარო სკოლის მართვის პროცესში არსებული ხარვეზების აღმოჩენისა და აღმოფხვრის ძირითადი მექანიზმია. „ზოგადი განათლების შესახებ“ საქართველოს კანონის თანახმად, საჯარო სკოლამ უნდა უზრუნველყოს თითოეული მოსწავლის, მშობლისა და მასწავლებლის უფლება, გაასაჩივროს მასწავლებლისა და სკოლის უკანონო და სხვა არამართლზომიერი ქმედებები, აგრეთვე მიიღოს მიყენებული ზიანის სრული ანაზღაურება. ამის მისაღწევად სკოლამ უნდა შეიმუშაოს საჩივრების მიუკერძოებელი და დამოუკიდებელი განხილვის ეფექტიანი საშუალება. საჩივრების ეფექტური სისტემა შემდეგ ძირითად პრინციპებს უნდა ემყარებოდეს: • წამოჭრილი პრობლემის არაფორმალური მოგვარების მხარდაჭერა; • საჩივრების პროცედურების ხელმისაწვდომობა; • საჩივრების პროცედურების სიმარტივე; • გონივრული და მკაფიოდ განსაზღვრული დროის ფარგლები საჩივრის განხილვის/გამოძიებისა და გადაწყვეტისათვის; • საჩივრით წამოჭრილი საკითხების სამართლიანი, სრული და მიუკერძოებელი განხილვა/გამოძიება და გადაწყვეტა.